十二章經

斯仁色彩 - 十二章經

位出席"斯仁色彩"o既賓客, 都會收到一張我同埋Fiona過往o既色彩~ 因為每位只會有十二款當中其中一張, 所以特別o向呢度Post返晒D內容出o黎先 ...

第一章
斯仁 の 出世

1981年2月18日，有一個7磅8安士的靚女於贊育醫院出世。

半年後，即係1981年8月18日，同樣於贊育醫院，有一個差不多成8磅o既肥仔就出世了。

第二章
斯仁 の 音樂

細過的仁，已經開始學彈鋼琴，讀過樂理，考就考到七級，不過合格就只係得四級喇！中四時和兩位同學一起出去學長笛，本身係諗住學色士風，不過成本太高了；中五畢業的暑假再去學打鼓、彈結他。

斯斯就差d唔記得，自己細過時都學過笛同埋結他；不過，最強都係唱歌，不時與知音好友，到不同K場練歌…

第三章
斯仁 の 拍拖

於大學時認識，臨畢業先開始拍拖；畢業後又巧合成為同行做錶，攪到行街有時都會一齊去睇錶鋪，當然都會行街、食飯、睇戲。另曾一齊去Paris、泰國、韓國首爾、台北旅行。

經過五年，斯斯終於成功，嘈o下嘈o下，嘈到俾佢結婚，嘈o下嘈o下又嘈肥埋仁仁。

第四章
斯仁婚禮

2008年1月6日下午3點，在一眾兄弟姊妹的努力下，斯仁就在中文大學聯合書院鄭棟材樓C1舉行了他們的婚禮 — 「斯仁影院」。

結婚後o既我地，開始展開了二人世界的生活，沒有太大的轉變，變的只是朋友都改口叫余生余太，同埋新年要派利是囉！

第五章
斯 の 小學

搬了去土瓜灣，在附近的聖提多幼稚園讀書。

小學時好好彩入o左間區內略有名氣的小學獻主會小學，亦好好彩6年都係精英班，所以我的同學仔都冇咩變過。

第六章
斯 の 中學

我就在協恩中學這間女校讀書。

每天著住藍色的長衫，背著書包行上斜斜的農圃道。

理科班的我，成績平平，但總算平安渡過所有的公開考試，平平淡淡的渡過了七年中學生涯。

第七章
斯 の 大學

靠著會考的成績入了中文大學物理系，每天除了讀書，就是玩。成績... 總算過得人過得自己，GPA 都有2.X 既。

大學一年級上了莊“物理號”，改變了我的人生。上莊令我認識到一大班好好的同學及朋友，由一個平平無奇的我，慢慢變得活躍，另外亦令我認識到現在的…仁。

第八章
斯 の 工作

完全對教書沒興趣的我，立定決心出來找工作。自知物理系畢業生出外找工作困難，未畢業就努力搵工，考完試後已經返緊工了。做了兩份短工，04年三月入o左去嘉暉，做到依家，都差不多四年幾了。好開心認識了幾個好朋友，公司給了我很多機會，學了好多野，由一個冇咩工作經驗，初出茅廬既傻婆，到依家都總算識得點樣待人接物。

第九章
仁 の 學海無涯

1984年，於中區堅道徽遠幼稚園開始讀書生涯；對“徽遠”的印象，只係第一日返學喊到飛起、一位同學及畢業時扮兔仔。

一年之後，轉入高主教書院，一條龍式由幼稚園低班，順利讀到中七畢業。考大學、入中大、讀物理；出o黎做o野一年後，又走去讀個Part Time奸商管理文憑；遲D唔知又會讀咩呢？

第十章
仁 の 搵錢

大學畢業後，本來得到教院取錄，讀多一年就可以入行教書，不過自知會誤人子弟，都係早日出o黎打滾一下。

入行做錶做電子，註廠三年多，後來轉工返香港，都係電子廠；唔知之後o既事途會係點呢？希望快D搵夠錢，等老婆可以全職做少奶奶。

第十一章
仁 の 足球場

中學開始熱愛踢波，與同班幾位唔識踢波的同學組成球隊，每逢星期六，到學校附近的明珠台足球場練波，風雨不改，諗返都痴痴地！

中五參加校隊B Grade足球隊，駐守左後衛。入大學後，效力物理系系隊，以擔任後防球員為主，大學三年級更兼任領隊，帶領球隊晉身十六強；同年更獲選成為聯合書院門將（後備）…呵呵！

第十二章
仁 の 紅十字會

中學時代，成日都攪攪震，參加o左紅十字會青年團第七團，由中一做o靚，上o下Course、步操、做o下義工…

中四成為Assistant Section Leader，中六仲做埋阿頭添！學過First Aid呀、Nursing呀、…而家冇晒lu！所以，有咩事，都係打九九九罷啦！

--- Felix